हक राजस्थानी भाषा का

¤ हक मांगै छै अपणी भासा/ हक सूं लेवां हक रौ खांवां ; हक रै टाळ कठै पण जावां ! हक रौ हाळी हक रौ माळी ; हक रौ धांन घरां निपजावां ! हक री करणी हक री भरणी; हक जीवां हक पर मर जावां ! हक सूं खेचळ हक सूं ब़ंतळ; हक सूं राड़ करां मिळ जावां ! हक सूं निरखां हक सूं परखां ; हक री ब़ातां मन ब़िलमावां ! हक सूं करां काळजौ सीतळ ; हक सूं अंतस ज्वाळ जगावां ! हक री सांसां हक री आसा ; हक री भासा बांच भणावां ! हक रौ तेड़ौ हक रौ गेड़ौ ; हक रौ बेड़ौ पार लगावां ! हक राखां हक नै नीं जांणां ; ऊंधै मारग खड़ियै जावां ! हक मांगै छै अपणी भासा ; हक सूं माँ नै मांन दिरावां!!