@@@@@ म्हारो हेलो सुणोजी वोटर वीर जी @@@@@
*****************************************************************
लोकतन्त्र रा धणिया,भारत माँ रा कंवरा,सता देवी रा भरतार ,
म्हारो हेलो सुणो जी वोटर वीर जी |ओ म्हारो हेलो सुणो जी वोटर पीर जी ||
चुनाव री चिन्ता में ,म्हाने रोटी नहीं भावे जी |
किंया थांने मुण्डो बतावां ,म्हांने शरम आवे जी ||
ओ वोटर सा पीर थांरी मन चाही चीज चढ़ावा,मन चाया वोट पांवा|
सता देवी रा भरतार ,
म्हारो हेलो सुणोजी वोटर वीर जी |ओ म्हारो हेलो सुणोजी वोटर पीर जी ||
थांरी याद में रात भर जागा,तिकड़म घणी भिड़ावा जी |
वोटां रे खातर म्हें लोगां ने ,आपस में लडावा जी ||
ओ वोटर सा पीर थांरी मन चाही भेंट चढ़ावा,मन चाया फल पांवा|
सता देवी रा भरतार ,
म्हारो हेलो सुणोजी वोटर वीर जी |ओ म्हारो हेलो सुणोजी वोटर पीर जी ||
थांरी चिन्ता करता -करता ,म्हें काजू-किशमिश खावां जी |
खा खा कर बादाम रो हलवो ,म्हें मोटा होता जावां जी ||
ओ वोटर सा पीर थांरी मन चाही चीज चढ़ावा,मन चाही जीत पांवा|
सता देवी रा भरतार ,
म्हारो हेलो सुणोजी वोटर वीर जी |ओ म्हारो हेलो सुणोजी वोटर पीर जी ||
महंगाई री मिक्सी सू, म्हें जनता रो जूस निकाला जी |
घोटाले रे घंटे सू ,म्हें चोरी रा चमा चालां जी ||
ओ वोटर सा पीर थांरी मन चाही भेंट चढ़ावा, मन कुर्सी पावां |
सता देवी रा भरतार ,
म्हारो हेलो सुणोजी वोटर वीर जी |ओ म्हारो हेलो सुणोजी वोटर पीर जी ||
*****************************************************************************